Ra’iisul Wasaaraha Itoobiya oo xil ka qaadis ku sameeyay Wasiirka A. Dibadda iyo wasiiro kale

 

 

November 1 (XeerNews24)

Ra’iisul Wasaaraha Itoobiya Hailemariam Desalegn ayaa shaqada ka eryay xubno muhiim oo aad ugu dhowaa, kuwaasoo ay ku jiraan Wasiirada Arrimaha Dibadda iyo Maaliyada Xukuumadda Itoobiya.

Is bedelkan ayaa ah mid loogu tala galay in wax looga qabto cabashooyinka iyo qulqulatooyinka ka imaanaya dadweynaha, kuwaasoo dhigaya dibad baxyo ay ku diidan yihiin dowladda.

Mr Hailemariam ayaa magacaabay 21 wasiir oo ay ku jiraan wajiyo cusub oo hoggaamin doono wasaaradaha maaliyada iyo arrimaha dibedda.

Isku shaandheynta Xukuumadda ayaa ku soo aadeysa, iyadoo dalka lagu soo rogay xaalad deg deg ah, waxaana muddo sanad ku dhow ka socda qaybo ka mid ah dalka Itoobiya banaan baxyo ka dhan ah dowladda, kaasoo ay dhigayaan labada qowmiyadood ee ugu ballaadhan Itoobiya

Xil ka qaadista Wasiirka Arrimaha Dibadda Itoobiya Tedros Adhanom ayaan ahayn mid layaab ah, maadaama horay loogu ansixiyay  inuu u tartamo Jagada madaxa Hey’adda Caafimaadka Adduunka ee WHO.

Waxaa lagu bedelay Tedros Adhanom Hoggaamiye kuxigeenka Ururka Dimoqraadiga Oromada, kuwaasoo qayb ka ah isbaheysiga talada haya oo ah isla maamulka sababay kacdoonka.

Xubno kale oo muhiim ah ayaa laga yaabaa in is bedel lagu sameeyo, si looga jawaabo dibad baxyada ay dhigayaan dadka Oromada iyo Amxaarada oo dowladda ku eedeynaya in laga gacan bidxeeyay adeegyadii iyo maamulkii dowliga, isla markaana isku koobeen koox yar..