Kaalmaddii ugu Horaysay ee Caalami ah ee Caruurta Rohingya oo gaadhay Bangaladesh.

Hayadda u qaabilsan Q/M daryeelka Caruurta ayaa sheegtay in ay gaadheen dalka Bangaladhesh Shixnadihii ugu horeeyay ee gargaar caalami ah ee loogu talagalay caruurta Qaxootiga ee Rohingya ee u cararay dalka Bangaladhesh.

Shixnadahan gargaarka ee deg-degga  ayaa gaadhaysa 100 tan, oo sida qorshuhu yahay loo qaybin doono carruurta Rohingya iyo Qoysaskooda sida hayadda unicef ku faafisay barteeda Internetka.

Warku wuxuu intaasi raacinayaa in Shixnaddaan gargaarka lagu gaadhsiiyay caasimadda Bangaladhesh ee Dhaka duulimaadyo dhanka hawada ah, waxaana loo sii daabuli doonaa goobaha ay ku sugan yihiin Caruurta Qaxootiga Rohingya ee ku yaal xuduudda labada dal.

Kaalmadaan ayaa ka kooban daawo lagu nadiifiyo biyaha, waxyaabo kale oo lagama maarmaan u ah nadaafadda Qoyska,maadooyin loo adeegsado daryeelka Caafimaadka iyo Qalab ay caruurtu ku cayaaraan.

Dhanka kale wakiilka hayadda unicef ee Bangaladhesh ayaa sheegay in Caruurta qaxootiga ah ee Rohinhya haddii ay helaan biyo nadiifa ay taasi ka hortag u noqon doonto cudurada faafa gaar ahaan Shubanka iyo wixii la mid ah.