Madaxweyne Farmaajo oo maalinta berri booqasho ku tagaya dalka Eritrea.

Madaxweynaha Soomaaliya Maxamed C/llaahi Farmaajo ayaa maalinta berri oo sabti ah la filayaa in booqasho lama filaan ah ku tagaya magaalada Asmara ee xarunta dalka Eritrea, kaddib markii uu casumaad rasmi ah uu ka helay dhiggiisa Eritrea Isaias Afwerki.

Sida uu xaqiijiyay Wasiirka Warfaafinta Eritrea Yemane Meskel Madaxweyne Farmaajo ayaa booqasho qaadna doonta saddex cisho maalinta berri oo ku beegan 28 bisha July uga bilaaban doonta Eritrea.

Ilo wareedyo ku dhow dhow Madaxtooyada oo ay heshay war baahintu ayaa xaqiijinaya in Madaxweynaha Eritrea uu taleefan kula soo xidhiiday Madaxweyne Farmaajo, kuna casuumay inuu booqasho ku yimaado Eritrea.

Booqashadan ayaa noqon doonta tii u horeysay oo Madaxweyne Soomaaliyeed ku tago Erirea oo xilli lagu eedeyn jiray inay taageerto Kooxaha Islaamiyiinta Soomaaliya, isla markaana sanadkii 2007-dii lagu aas aasay Asmara Isbaheysigii la magac baxay Dib u xoreynta ee dagaalka kula jiray Ciidamadii Itoobiya ee soo galay Koonfurta Soomaaliya dhamaadkii sanadkii 2006-dii.

Xidhiidhka cusub ee u bilowday dalalka Eritrea iyo Itoobiya oo mar ahaa labo dal oo colaad ka dhaxeysa ayaa waxay u gogol xaadheysaa xasilooni iyo nabadgelyo ka dhacda dalalka Gobolka oo xiisado siyaasadeed iyo colaado ay ka jiraan.

Istiraatiijiyada siyaasadeed ee Gobolka iyo loolanka loogu jiro dalalka kulaala Badda Cas ayaa hubanti ka dhigaya in Soomaaliya qeyb ka noqoto, gaar ahaan loolanka ka dhaxeeya dalalka Khaliijka sida Sacuudiga iyo Imaaraadka oo dhinac ah iyo Turkiga iyo Qatar ayaa u muuqanaya mid Soomaaliya saameyn weyn ku yeelaneyso.