Qof Meyd ah ayaa ka soo dhacay Diyaarada Kenya Airways.

Beer kutaala duleedka magaalada London ee caasimada dalka Ingiriiska ayaa laga helay meydka nin la tuhmayo in uu kasoo dhacay Diyaarada Kenya Airways oo ku dageysay garoonka diyaaradaha ee Heathrow.

Meydka ninkan oo wali aan la aqoonsan cidda uu yahay ayaa laga helay beer yar oo ku taal deegaanka Clapham, oo kutaala koonfur galbeed ee magaalada London, waxaana meydka arkay nin xiligaasi ku sugnaa beerta uu ku soo dhacay.

Waxaa loo badinayaa in ruuxa meydkiisa la helay in uu isku soo qariyay qeybta taayarada ee Diyaarada Kenya Airways oo kasoo duushay magaalada Nairobi, waxaana goobta la tuhmayo laga helay boorso ,cunno iyo cabitaan ku jireen.

Booliiska magaalada London ayaa bilaabay in ay baadhitaano ku sameeyaan meydka ninkan diyaarada kasoo dhacay, waxaana la filayaa in booliiska kiiskan war kasoo saaraan marka baadhitaanada dhamaadaan.

Afhayeen u hadlay shirkadda Kenya Airways ayaa sheegay in ay xidhiidh dhaw la sameeyeen saraakiisha Nairobi iyo London si looga sal gaadho meydkaasi diyaaradda kasoo dhacay, waxa uuna afhayeenka xusay in diyaaradooda baadhitaano kadib aan wax dhibaato ah lagu arkin.

Dhacdadan ayaana aheyn tii ugu horeysay oo London lagu arko, waxaana dhowr mar oo hore meelo ku dhaw dhaw garoonka Diyaaradaha Heathrow lagu arkay meydadka dad kasoo dhacay diyaarado ay isku soo qariyeen.